Удмурт нимыз:: “Бырон улэ шедем финн-угор кылъёсты улӟытон (ревитализация) понна компьютер пыр кылдытэм амалъёс”
Англи нимыз: “Computational tools for the revitalization of endangered Finno-Ugric minority languages (FinUgRevita)”
Ӟуч нимыз: "Компьютерные средства для ревитализации финно-угорских языков под угрозой исчезновения (FinUgRevita)"
Проект бордын ужало Хельсинкиысь но Сегедысь университетъёс. Финн котретлэн кивалтӥсез – Роман Янгарбер, мадьяр котретлэн кивалтӥсез – Анна Феньвеши.
Проект быдэстӥське Финляндиысь тодосъя академилэн но Венгриысь тодос эскеронъя фондлэн юрттэменыз (ОТКА).
Проектлэн лыдпусэз: OTKA FNN 107883; AKA 267097
Быдэстон вакыт: 1 куарусён 2013 ар – 31 гудырикошкон 2017 ар
Проектлэн ужпумез: компьютер пыр кылдытэм амалъёсыз уже кутыса, Россиысь бырон улэ шедем финн-угор кылъёслы юрттэт сётон. Та амалъёс юрттозы анай кылын вераськисьёслы кылзэс ужазы кутыны дигитальной дуннее зымыса. Озьы ик чаклаське социолингвистика амалъёс пыр дунъяны та амалъёслэсь пайдалыксэс. Эскеронмы пыр турттӥськом практической валэктон шедьтыны проектамы ӝутэм валтӥсь юанъёслы: кызьы луысал мыло-кыдо юрттэт сётыны Россиысь бырон улэ шедем финн-угор кылъёслы, кызьы луысал кужмоятыны вераськись калыкез, маин юрттыны луысал кыл ревитализацилы.
Проектмылэн компьютер пыр кылдытэм кылтодон ёзэз – ки улэ сюрись кылтодон ваньбурез уже кутыса (кыллюкамъёс но кылрадъян), бырон улэ шедем финн-угор кылъёслы дышетсконын но текстъёс гожъянъёсын юрттӥсь компьютерной тӥрлык кылдытон. Вераськон мынэ сыӵе амалъёс сярысь, кудъёсыз луонлык сётысалзы анай кылын вераськисьёслы кылзэс туала дискурсивной кабъёсын кутыны, кудъёсыз пӧртэм гожъяськон кулэлыкен валче тупасалзы котькуд нунал кутӥськись кыллы. Милям малпанмыя, та выллем тӥрлык кылдытон бадӟым пайда но кужым сётысал анай кылын вераськисьёслэсь данзэс ӝутон понна, соослэсь ас анай кылзы шоры малпанзэс воштон понна, бератаз ревитализациез быдэстон понна но.
Проектлэн социолингвистической ёзэтэз – кылдытыны кутскем тӥрлыкъёслэсь пайдалыксэс валан. Та амалъёсыз кылдытэмлэсь но улонын кутэмлэсь азьло но со бере малпаськомы быдэстыны социолинвистической эскерон. Та ужрадъя валаны луоз, макем воштӥськиз шуыса югдур соосыз уже кутэм бӧрсьы.
Туннэ нуналлы асьмеос ужаськом кык кылын – манси но удмурт кылъёсын.